Бөйрәкәйҙәр ҡурала

Ауыл хужалығы фермаларында малдарҙы йылы аҙбарҙарҙа ҡышлатыу осоро бара. Бөгөн уларҙы имен-аман ҡыш сығарыу — төп бурыстарҙың береһе.

Швейкина Г.И. хужалығында бөйрәкәйҙәр ышаныслы ҡулдарҙа: улар тейешенсә ашатыла, тәрбиәләнә. Мал ҡараусы Камил Кәримов һәм Данис Бикбулатов үҙ эштәренә етди ҡарай.

— Малдар аҙыҡ менән тулыһынса тәьмин ителгән. Сенаж соҡоро ферма янында, бесән-һалам да йыраҡ түгел, шуға күрә уларҙы ташыу артыҡ мәшәҡәт тыуҙырмай. Һыйырҙарға иртәле-кисле силос, сенаж бирәбеҙ, бесән һәр саҡ алдарында. Ашлыҡ фуражын һауынсылар үҙҙәре бүлеп бирә. Аяҙ, йылыраҡ көндәрҙә малдарҙы ялан кәртәләргә сығарабыҙ, - тип үҙ эштәре менән таныштырҙы Д.Бикбулатов.

Һыйырҙарҙан тыш малсылар урындағы тирмәндә ашлыҡ та тарттыралар, башмаҡтарҙы ла ҡарайҙар. Тырыш малсылар булған ерҙә ҡышлатыу уңышлы үтәсәгенә шик юҡ.

Дилара Бәҙретдинова.