Һағындыра мәктәп йылдары!

2000 йылда 1-се Архангел мәктәбен тамамлаған беҙҙең класс өсөн һуңғы ҡыңғырау яңғыраны. Ышанып та булмай был хәлгә, мәктәпте тамамлауға бына 25 йыл үтеп тә киткән! Уйлаһаң, сәстәр үрә торорлоҡ, ҡайһылай ваҡыт тиҙ аға. Хәҙер инде күптәребеҙ юғары һәм махсус урта белемле, тормошта үҙ урыныбыҙҙы тапҡанбыҙ, ғаилә ҡороп, матур ҡыҙҙар, батыр улдар үҫтерәбеҙ.

Архангелдә мәктәп-гимназия класы асылғас, Муллаҡайҙан, Ҡыҙғынан, Тәүәкәс, Зәйет ауылдарынан тырыш ҡыҙҙар һәм малайҙар килде, ә шулай уҡ Приуральенан һәм Архангелдән дә был башҡорт класына күсеүселәр күп булды. Класс етәксебеҙ Фәйзуллина Зилә Шәмсетдин ҡыҙы тәрән аҡыллы, иғтибарлы һәм баҫалҡы, бер ҡасан да төшөнкөлөккә бирелмәгән тәжрибәле уҡытыусы ине, үҙенең хеҙмәт юлы барышында йөҙәрләгән уҡыусыға үҙ аллы тормош юлына сығырға ярҙам ҡулы һуҙҙы. Үҙенең оптимизмы менән ул беҙҙе мәктәп тормошона йәлеп итте, үҙ көсөбөҙгә ышанырға өйрәтте. Уңыштарыбыҙҙы ла алдан билдәләне. Уның энергияһы шишмә кеүек урғылды: ғәжәйеп кисәләр, күңелле конкурстар ойошторҙо, беҙҙе экскурсияларға алып йөрөнө. Төрлөбөҙ төрлө холоҡло инек, әммә ул беҙҙе дуҫлаштыра алды. Әлеге мәлдә лә хаҡлы ялда булыуына ҡарамаҫтан ул район “Ағинәйҙәр” ойошмаһы рәйесе булып районыбыҙҙың йәмәғәт тормошонда әүҙем ҡайнап йә-шәй.

“Инйәр” гәзите конкурс иғлан иткәс яҙмайынса булдыра ал-маным, бәлки класташтарым мәктәп фотоларын күреп “Инйәр”ебеҙҙең юбилейында осрашыуға килерҙәр тип уйланым.       

Класташтар менән күрешеп яҡты бала саҡ хәтирәләрен, мәктәп йылдарын иҫкә төшөрөп, яратҡан уҡытыусыларыбыҙ менән осрашып алыр инек.

Элиза Баязитова. Архангел ауылы.

Автор тарафынан ебәрелгән фото.