+16 °С
Болотло

Бөтә яңылыҡтар

19 Февраль 2021, 14:40

Регина Искәндәрова шиғырҙары

Ҡышын яуған ямғыр

Ҡышын яуған ямғырҙы аңламайым

Сүкей ерҙе һәр бер тамсыһы.

Нимә уйлап ерҙе борсой икән

Яҙҙың микән уҫал ҡамсыһы?

Күктә ҡояш. Уның нурҙарында.

Ямғыр мең төҫ менән балҡыны.

Был ямғырҙан рәхәтлек тапманым

Тик тоямын ҡыштың һалҡынын.

Ҡышҡы ямғыр барыбер бер мөғжизә

Беләм яҙға әле иртәрәк.

Яҙым әле күпме ашҡынһа ла

Ҡыш үҙ һүҙле, ҡуйыр кәртәләр.

Күп ғазаптар аша килгән ямғыр

Саф булһа ла, түгел яғымлы.

Тәбиғәттең ошо мөғжизәһе

Хайран итте тирә-яғымды.

Күрергә тип килдем урманыма

Бүлешергә серен, уйҙарын.

Һалҡын ямғыр боҙ-ҡалҡанға төргән

Ағастарҙың зифа буйҙарын.

***

Эргәмдәһең, ә мин һағынам

Дегет ҡара, ҡуйы тулҡын сәсең…

Гел тораһың шулай ҡаршымда

Һөйәһеңме, һөймәйһеңме мине

Ниндәй уйҙар йөрөй башыңда?

Ҡуйы сәстәреңде һирпеп ташлап,

Йырлай инең шулай өҙөлөп.

Бөгөн сәстәрең юҡ, башың ялтыр

Ҡояш торған кеүек гел көлөп.

Мин барыбер ғашиҡ инде һиңә

Ҡуйы сәсең минең бәхеткә.

Һин күтәрҙең минең хистәремде

Бейектәрҙән бейек тәхеткә.

Баштарыңдан һыйпап үбәм әле

Таң елдәре кеүек иркәләп.

Минең шатлыҡтарым һинеке ул

Йәшәү насип булһын иркенләп.

Мин мөкиббән йырың, буй-һыныңа

Эргәмдәһең, ә мин һағынам

Тальян уйнап әле йыр һуҙаһың

Мин шул йырҙарыңа табынам.

***

Шиғыр яҙған булам арып-талып.

Ә уйҙарым саба, тыям саҡ

Йылы хистәр тарата шомдарҙы

Талсығыуым бөтә ысын, хаҡ.

Шиғыр яҙам, төн йоҡомдо алып

Бәхет ҡушам килер уйыма.

Күҙ йәштәрем эстән генә һарҡып

Йәрәгемә тоҙо йыйыла.

Шиғырымда бөтә ихласлығым

Рухым көсө үҫә ишәйеп.

Йылдар ғына бер-бер артлы үтә

Көс өҫтәйҙәр миңә, йәшә тип.

Ҡартайтылды, тик ҡыйыулыҡ йыйып

Шиғыр яҙған булам мин һаман.

Хистәр йөрөтә йәшлек туғайында

Үтһә үтте инде ул заман.

Шиғыр яҙыу ул бәхет өҫтәмәй

Тик мин ҡорбан шиғыр ҡулында

Мәңге риза ҡалырға был юлда

Моңға һыуһап йырым тыуғанда.

Регина Искәндәрова,

Үрге Ырныҡшы ауылы.

Читайте нас:

Адресы: 453030, Архангельский район, с. Архангельское, ул. Советская, 18

Телефондар:

Баш мөхәррир: 83477421457

Реклама хеҙмәте: 8-347-74 (2-18-66)

Редакция: 8-34774 (2-12-87)

Кадрҙар бүлеге: 8-34774 (2-18-44)

Электрон почта: [email protected]