Милли проект һөт тармағын үҫтереүгә йүнәлтелгән

Башҡортостанда һөт тармағын комплекслы үҫтереү программаһына инвестициялар 60 миллиард һумдан артасаҡ, тип белдерҙе Башҡортостандың ауыл хужалығы министры урынбаҫары Юрий Лысов Санкт-Петербургта барған XI Һөт олимпиадаһында.

Комплекслы программаны Һөт союзы менән берлектә әҙерләгәндәр. Был иһә 2030 йылға һыйыр ағын етештереүҙе ике тапҡырға арттырып, күләмде 1,5 миллион тоннаға еткереү мөмкинлеген тыуҙырасаҡ. Хужалыҡтарҙа бер һыйырҙан йылына 9000 килограмм һөт алыу күҙаллана. Һәр башты идентификация уҙғарып, сервис инфраструктураһын формалаштырып, фермаларҙы яңыртыу планлаштырыла.

Әле Башҡортостанда ауыл хужалығы өсөн тәғәйенләнгән 7 миллион гектар ер бар. Һөт етештереү күләме 1624 мең тонна булһа, һыйыр малы 978 мең баш тәшкил итә, шулай уҡ 3,2 мең тонна ҡымыҙ бешкәнбеҙ.

Төбәктә ауыл хужалығы тармағында 65 инвестпроектты тормошҡа ашырырға йыйыналар. Уларға 299 миллиард һум аҡса һалыу ҡаралған. Был пландар ғәмәлгә ашһа, төбәктә өҫтәмә 12 мең хеҙмәт урыны барлыҡҡа киләсәк.

Был саралар "Халыҡ-ара кооперация һәм экспорт", "Ауыл хужалығы комплексы тауарҙары экспорты" милли проекттарына ярашлы тормошҡа ашырыла.