Махсус хәрби операцияла хеҙмәт итеү — ул ҡыйыу кешеләр өсөн һынау

Украиналағы махсус хәрби операция башланыу менән ҡурҡыу белмәҫ ир-егеттәребеҙ илебеҙ һағына баҫты. Улар бөгөнгө көндә үҙ бурыстарын намыҫ менән үтәй. Уҫаҡлы ауылынан һуғыш яланында “Монтер” исемен йөртөүсе яҡташыбыҙ бына шундайҙарҙан. Тыуған илгә хәүеф янағас, батыр һалдаттар сафҡа баҫа һәм дошмандың һөжүмен кире ҡаға.
Махсус хәрби операцияға оҙатылғансы райондашыбыҙ Себерҙә нефть скважиналарын төҙөүсе-монтажсы һөнәре буйынса вахта ысулы менән эшләгән. Өйләнгән, ғаиләлә 16 һәм 5 йәшлек ике ул үҫә. Тормош иптәше Зилә менән район үҙәгендә бөтә уңайлыҡтары булған йорт төҙөп сығалар. Илебеҙ тыныслығын һаҡлау өсөн 2-се Салауат Юлаев исемендә башҡорт батальонына ирекмәндәр йыя башлағас, ул оҙаҡ уйламай, яҙылырға була. Үткән йылдың авгусында Түбәнге Новгород өлкәһендә хәрби әҙерлек үтә һәм артабан махсус хәрби операцияға юллана. Әлеге ваҡытта яҡташыбыҙ пулеметсы булып хеҙмәт итә.
Күптән түгел һанаулы ғына көндәргә ялға ҡайтты. Барлыҡ туғандары һәм яҡындары өсөн ҡыуаныслы ваҡытта беҙгә лә уның менән осрашып, әңгәмәләшеү бәхете тейҙе.
Башта һорауҙар “ҡайнай”, барыһы ла ҡыҙыҡһындыра. Мәҫәлән: йәшәү шарттары, хәрбиҙәрҙең бер-береһенә нисек ярҙам итеүе, буш ваҡыттарын нисек үткәреүе, тыуған яҡты һәм туғандарын һағыныу хистәрен нисек еңеүе...
Тик “Монтер”, махсус хәрби операциянан ҡайтҡан башҡа егеттәр һымаҡ, унда булған ваҡиғалар тураһында аҙ һөйләй. Яуап бирһә лә — теүәл һәм етди. Ҡыҫҡаһы, ысын ир-егеттәрсә.
— Әлбиттә, тәүге осор туғандарым һәм ғаиләм бындай аҙымға барыуға ҡырҡа ҡаршы ине. Һуңынан туҡтатыуҙың файҙаһы юҡ икәнен һәм иртәме-һуңмы минең унда китәсәгемде аңланылар. Илде һаҡлау — һәр ир-егеттең төп бурысы тигән фекерҙә мин , — тине әңгәмәсебеҙ.
Хеҙмәттәштәре менән мөнәсәбәттәр яҡшы, дуҫтарса, һәр ваҡыт үҙ-ара ярҙамға килергә әҙерҙәр. Дөйөм хәүеф хәрби рухты күтәрә һәм бөтәһен дә хәрби туғанлыҡ менән берләштерә. Тыуған яҡтан гуманитар ярҙам даими килеп тороуы, бөтә кәрәк-яраҡтар менән тәьмин ителеүҙәре, мәҫәлән, мунсаны ла Башҡортостан ирекмәндәре хәстәрлеге менән булдырыуҙары хаҡында һөйләй яугир.
Бында уның ҡайтыуын һәм бәйләнешкә сығыуын, сәләмдәрен ата-әсәһе, ғаиләһе түҙемһеҙлек менән тилмереп көтә, иҫән-һау йөрөүен теләп Хоҙайға изге доғаларын юллай.
Беҙ ҙә, үҙ сиратыбыҙҙа, райондашыбыҙға хәйерле, изге, имен юлдар теләйбеҙ! Иҫән-һау әйләнеп ҡайт, ҡыйыу егет!
Ҡырмыҫҡалы һәм Архангел райондары хәрби комиссариатының телефон номеры: 8 (34765) 2-14-78.

Физәлиә Ғәниева.
(фото ғаилә архивынан алынды)