Әүҙемлек дауам итә.

Район үҙәгенең мәҙәниәт йортондағы 870-се һайлау участкаһына халыҡ ағымы иртәнге сәғәттәрҙән үк әүҙемлеген юғалтмай. Һайлаусылар — йәштәр, бәләкәй балаларын етәкләгән ата-әсәләр, оло быуын вәкилдәре үҙҙәренең ялында күңелдәре ятҡан кандидатҡа тауыш бирергә ваҡыт тапты.

— Беҙҙең участкала бөтәһе 1748 кеше теркәлгән. Улар араһында 18 йәшен тултырғандар дүртәү. Әйткәндәй, береһе гражданлыҡ бурысын үтәне. Иртәнге сәғәт 10.00-дан өйҙәргә барып һайлатыу бригадалары эшләй. Участкаға килеп тауыш бирә алмаған граждандар телефон аша шылтыратып, ғариза биргәндән һуң улар тәғәйен адрестарға юллана. Халыҡ бик әүҙем: көндөҙгө сәғәт 12-гә ҡарата белешмәләргә килгәндә тауыш биреүселәр дөйөм һандың 437-еһен, йәғни 25 процентын тәшкил итә, — тип һөйләне участка һайлау комиссияһы рәйесе М.А.Алтдинов.