Ярты быуат — дәүләт хеҙмәтендә

Камил Абдулла улының атаһы Абдулла Мөхәмәтрәхим улы Ҡырмыҫҡалы районынан, ә инәһе Факиһа Зөлфәр ҡыҙы — Абҙандыҡы. Сәйфетдиновтар 1946 йылға тиклем Көмәрлелә йәшәйҙәр, артабан — Архангел ауылында. Абдулла Мөхәмәтрәхим улы Бөйөк Ватан һуғышы ветераны. Фронттан һуң, Эске эштәр оргадарында тәртип һағында тора.

Камил Сәйфетдиновҡа ла башҡа тиҫтерҙәре кеүек үк һуғыш һәм  унан һуңғы ауырлыҡтарҙы кисерергә тура килә. Архангел ауылында 6-сы класты тамамлағас, ФЗО-ла төҙөүсе, балта оҫтаһы һөнәрен үҙләштерә.

Ил буйынса төҙөлөштәр осоро. 1956 йыл  йүнәлтмә буйынса Сибай ҡалаһының “БашМедьСтрой” ойошмаһына урынлаша. Бер аҙҙан районға ҡайтып, водитель таныҡлығы ала һәм “Инйәр” совхозында шофер булып хеҙмәт юлын башлай. “Газ-67” машинаһында “Инйәр” совхозының партком секретары Филимоновты йөрөтә. “Газ-93”-тө биргәс, Ҡарлыман станцияһынан аҙыҡ-түлек ташый.

1958 йылда армия сафына саҡырыла. Йәш һалдат курсын Ҡурған өлкәһе Шадринск ҡалаһында үтә. Уның водитель икәнен белеп, машина руле артына ултырталар. Башта алты ай “Газ-69”-ҙа — батальон командирының,  аҙаҡ  “Победа” еңел машинаһында генералдың шәхси водителе.  1960 йылдың 1 майында Свердловск янында  совет ракетаһы америка разведчик самолетын бәреп төшөргәндә, яҡташыбыҙ мөһим ваҡиғалар уртаһында ҡайнай.

Армиянан ҡайтҡас, киске мәктәптә белемен камиллаштыра. 1968 йылға тиклем 7-се янғын һүндереү часында эшләй. Шул осор Салауат индустрия техникумын ситтән тороп тамамлай. “Инйәр” колхозының  (хужалыҡ составына: Архангел, Тәүәкәс, Устиновка, Воробьевка ауылдары ингән) баш инженеры итеп тәғәйенләнә. 1969-1975 йылдарҙа — “Инйәр”, “БАССР-ҙың 50 йыллығы”  колхоздарының  партком секретары. 1975 йылда райкомдың ойоштороу бүлеге мөдире итеп һайлана. 1990 йылда — “Урал” колхозының рәйесе. 1993 йылдан 2005 йылға ҡәҙәр — Өфө ҡалаһының “Фреон” производство-төҙөлөш кооперативында өлкән белгес. Камил Абдулла улының дөйөм хеҙмәт стажы — 50 йыл.

Тормош иптәше Эмба Мәзғүт ҡыҙы (Гәрәева) менән өс бала тәрбиәләп үҫтергәндәр. Хәләл ефете  ғүмер буйы һаулыҡ һаҡлау өлкәһендә хеҙмәт иткән.

Илдә барған хәлдәрҙе барлап, ил ағаһы:

— Һәр кешенең тормошо эштә уҙа. Бөгөн беҙҙең егеттәр алғы һыҙыҡта тора. Кемдер һуғышта,  кемдер емерелгән ҡалаларҙы төҙөкләндерә, кемдер үҙ ойошмаһында йәки предприятиеһында  илебеҙ, Ватаныбыҙ мәнфәғәтендә намыҫлы хеҙмәт итә. Барыһы ла — тыныслыҡ хаҡына, — ти.

Д.Янбаева.

Фото — ғаилә архивынан.