Йәш быуынға арналған тырыш хеҙмәт юлы — изге ғәмәл

Оҙондар мәктәбендә 37 йыл эшләп, өс башҡорт ауылы (Аҙау, Айытмәмбәт, Оҙондар) балаларына рус теле һәм әҙәбиәте серҙәрен эҙмә-эҙлекле төшөндөрөп, уҡыусылары, хеҙмәттәштәре, ата-әсәләр араһында оло хөрмәт ҡаҙанған ҡәҙерле һеңлебеҙ Фая Миңлеғәли ҡыҙы Ғәзизова 23 февралдә үҙенең алтмышынсы тиҫтәһен тултыра. Матур юбилейын ул күңел бөтөнлөгө, рух юғарылығы менән ҡаршылай.

Тыуған ауылыбыҙ Аҙауҙа инәйебеҙ Фариза Хәлиулла ҡыҙы менән атайыбыҙ Миңлеғәли Һарун улы Шиһабетдиновтарҙың татыу ғаиләһендә алтынсы бала булып донъяға килде Фаябыҙ. Бәләкәйҙән теремек, отҡор, ифрат тырыш ҡыҙ башланғыс кластарҙа тәжрибәле педагог, БАССР-ҙың мәғариф отличнигы (Күгәрсен районы Юлдыбай ауылында тыуып-үҫеп, Темәс педучилищеһын тамамлаған), минең дә тәүге уҡытыусым Нәзирә Әхмәҙулла ҡыҙы Ниғмәтуллина-Ғүмәрованан белем алды. Хөрмәтле остазыбыҙға һоҡланып, ғашиҡ булып, уға оҡшарға тырышып, мөғәллимә һөнәренә һөйөү йөрөттө.

Фая һеңлем бәләкәйҙән әҙәбиәт яратты. Ғөмүмән, тыуған йортобоҙҙа гәзит-журналдар бик күп алынды, әҙәби китаптар һәр саҡ ҡәҙерле рухи байлыҡ һаналды. Инәйебеҙ беҙҙе көн һайын тиерлек ауыл китапханаһына ебәреп, үҙе лә ихлас уҡып бара, һәр беребеҙҙең өйгә бирелгән эштәрен тикшерә, уҡыта, ятлата торғайны.

Аҙау урта мәктәбен тамамлағас, етди маҡсатлы ҡыҙ Башҡорт дәүләт университетының филология факультетына имтихандарын уңышлы тапшырып, студент булып китте. Уҡыу йортонан һуң, дипломлы белгес бер йыл Тәүәкәс мәктәбендә эшләп, артабан Оҙондар урта мәктәбенә тәғәйенләнде. Көслө уҡытыусылар тупланған берҙәм коллектив йәш педагогтың артабанғы үҫешенә оло этәргес бирҙе.

Атайыбыҙҙың инәһе Сәлхиҙә өләсәйебеҙҙең тыуған ауылында эшләү ҙә күңеленә ҡанат, яуаплылыҡ өҫтәгәндер. Аҙауға кейәүгә сығып, өс малайға ғүмер биреп, улдары бәләкәй генә саҡта ҡаты ауырып, баҡыйлыҡҡа күскән өләсәйебеҙҙең үҫмер сағын һаҡлайҙыр, бәлки, оҙондарҙың тау-урмандары...

Ошо тарихи ауылда Фая туғаныбыҙ атай         ым кеүек үҙе эшсән, үҙе аҡыллы егет — Фатих Ситдыҡ улы Ғәзизов менән танышып, туй яһап өйләнешеп, матур ғаилә ҡороп ебәрҙеләр. Бер-береһен аңлап, ихтирам итеп, тырышып донъя көтөүҙәренә барыбыҙ ҙа ихлас ҡыуанабыҙ. Кейәүебеҙ мәктәптә физкультура дәрестәрен алып барҙы. Өс йыл ауыл хакимиәте башлығы булып та эшләп өлгөрҙө. Уҡыусылары район кимәлендә уҙғарылған саңғы, волейбол, еңел атлетика ярыштарында ҡатнашып, алдынғы урындар яулай торғайны. Ғаилә башлығы әле лә тынғыһыҙ, әүҙем, ауылдаштарына һәр саҡ ярҙам итергә әҙер. Етеш тормошта йәшәргә ынтылыштары — үҙе ҡыуаныс. Фатих кейәүебеҙ маҡтауға лайыҡ кеше: бар күңеле, булмышы менән иманлы, ислам дине ҡанундарына тоғро.

Ғәзизовтар — һәр яҡтан тырыш, ышаныслы, маҡсатлы ғаилә пары. Күҙҙәр генә теймәһен... Мин үҙем, 16 йыл район мәғариф бүлегендә туған телдәр буйынса методист булып эшләгәс, Фая Миңлеғли ҡыҙының асыҡ дәрестәрен, уның ҡатнашлығында үткән семинарҙарҙы, тәрбиәүи сараларҙы күп күрҙем. Ипле итәғәтле һеңле генә түгел, иң мөһиме, етди ҡарашлы, ҡыйыу фекерле, үтә талапсан һәм үҙ һөнәренә ихлас ҡыҙыҡһыныу уята белгән тәжрибәле педагог. Уҡытыусы илһамланып, дәртләнеп эшләмәһә, уңыш булмай. Ф.М.Ғәзизова районыбыҙҙың көслө уҡытыусыларының алдынғы методик алымдарын ныҡлап өйрәнде, һөнәри йүнәлештә туҡтауһыҙ эҙләнде. Оҙондар урта мәктәбенең абруйлы педагогтары: Мәрзиә Мәхәмәтғәли ҡыҙы Юламанова, Венера Сабит ҡыҙы Шаһиева (мәрхүмә), Рәйсә Фазылйән ҡыҙы Насырова (мәрхүмә), Зәйтүнә Динислам ҡыҙы Әбделвәлиева, Сания Сәлимгәрәй ҡыҙы Лоҡманова, Лилиә Шәмсетдин ҡыҙы Ғәзизова һәм башҡалар уға өлгө булып торҙолар. Уларҙың эшмәкәрлеген күреп, фәһем алып, балаларҙың ижади һәләттәрен төрлө яҡлап асыуға, ошо йәһәттә үҙенсәлекле йөкмәткеле дәрестәр, үҫмерҙәрҙең рухи үҫешен байытырҙай тәрбиәүи саралар әҙерләп үткәреүгә күп көс һалды.

Район, республика кимәлендәге олимпиадаларҙа Фая Миңлеғәли ҡыҙының уҡыусылары яҡшы һөҙөмтәләр күрһәтте, призлы урындар яуланы. Юғары уҡыу йорттарына рус теле һәм әҙәбиәтенән имтихандарҙы һәйбәт тапшырып, тырышып белем алып, төрлө һөнәр эйәләре булып киткән, уҡытыусылыҡты ла һайлаған егет-ҡыҙҙар менән ифрат ғорурланып, улар тураһында йылмайып, эскерһеҙ һөйөнөп телгә ала ул.

Ф.М.Ғәзизова 2010 йылда уҡ “Башҡортостан Республикаһының иң яҡшы рус теле уҡытыусыһы”  номинацияһында грант алыуға өлгәште. БР Мәғариф министрлығы, район мәғариф бүлеге тарафынан уның өлгөлө эшмәкәрлеге Маҡтау грамоталары менән баһаланды. Нисәмә быуын балалары уның ҡулдары, әсәләрсә хәстәрлеге аша үтте. Белемен, урынлы кәңәштәрен, изге теләктәрен йәш быуынға йәлләмәй өләшкән уҡытыусының эргәһенә, өйҙәренә килеп, хәлен белешеп торалар улар.

Кеше янып йәшәй, янып һөйә, янып эшләй. Шулай инде: донъя уттарында яна-яна тырышып хеҙмәт итеп ғүмер иткәс, көлгә түгел, ә гүзәлдәрҙән-гүзәл гөлгә әйләнә әҙәм балаһы.

Фая һеңлебеҙ — нескә күңелле ҡатын-ҡыҙ. Моңло итеп йырлай, шиғырҙарҙы илһамланып яттан һөйләй, һәр кемебеҙ тураһында оло хәстәрлек күрә, төрлө яҡлап ярҙам ҡулы һуҙа. Йөрәгендәге сихри ҡөҙрәт серен үҙе генә белә.

Иренә ышаныслы, тоғро, һөйөклө тормош иптәше, ике балаһына ихлас өҙөлөп торған әсә, кейәүенә ихтирамлы ҡәйнә, күҙ ҡараһындай күргән ейән-ейәнсәренә мөлдөрәмә иғтибар бүлгән өләсәй ул беҙҙең һеңлебеҙ. Ҡыҙҙары Алинаға һәм улдары Айҙарға юғары белем алырға ярҙамлашты атай менән әсәй, Артур кейәүҙәрен дә үҙ улдарылай хөрмәт итәләр, ҡала мәктәбенең башланғыс кластарында уҡыған Эмилия менән Әминдең ауылға килеүен олатай, өләсәй һағынып көтөп ала.

Эш бәхете лә, ғаилә бәхете лә берҙәй ҡәҙерле бит. Ошо бөтөн генә бәхеттән бер кемде айырмаһын Хоҙай Тәғәләбеҙ.

Гөлирә Фәйрүзова,

педагогик хеҙмәт ветераны,

БР мәғариф отличнигы.

Тәүәкәс ауылы.

Фото — ғаилә архивынан.