Фәнистәр сая була

Фәнис Фаил улы Айытҡолов 1985 йылда Зәйет ауылында Динә Миҙхәт ҡыҙы менән Фаил Нуритдин улы Айытҡоловтарҙың ғаиләһендә беренсе бала булып донъяға килә. Ғаилә башлығы урман хужалығында эшләй, билдәле һунарсы һаналһа, Динә Миҙхәт ҡыҙы Зәйет мәктәбендә — пионервожатый, балаларҙы немец теленән  уҡыта. Бәләкәйҙән теремек, сая малайҙы класс етәксеһе Илүзә Усман ҡыҙы Ғафарова йомарт, бер ҡатлы, илгәҙәк бала тип  хәтерләп:

— Фәнискә “өф” итеп кенә белем бирҙем. Ҡосаҡлап ултырып ҡына “Әлифба”ның серле хәреф донъяһына төшөндөрҙөм. Бигерәк иркә ине, мине инәһе кеүек ҡабул итте, гел янымда йөрөнө. Уның беренсе партала һөйөү тулы күҙҙәре менән йотлоғоп тыңлап ултырғаны һаман күҙ алдымда. Башынан һыйпап, арҡаһынан тупылдатып яратып уҡытҡан балаҡайым минең. Шул тиклем тырыш булды. Бер ваҡытта ла өйгә эшен эшләмәй килмәне. Байрамдар үткәрһәк, ихлас ҡатнашты. Мин баянда уйнайым, ә ул йырлай. “Моряк” бейеүен башҡарыуын  әле лә иҫләйем. Инәһе матур итеп костюм теккән ине.

Фәнис һәр ваҡыт көлөп-йылмайып йөрөнө. Ирендәре генә түгел, ә күҙҙәре лә нур сәсеп йылмайҙы. Спорт ярыштарында, физкультура дәрестәрендә иң етеҙе  булды. Командаһы еңһә үрле-ҡырлы һикерер, ә еңелһә — ғәрләнеп, иларға ла күп ҡалмай.

Фәнис ихлас, тәрбиәле, тормошто, бар булмышты яратҡан батыр булып йөрәгемдә ҡаласаҡ, — тине.

9-сы класты тамамлағас, белемен  Максим Горький мәктәбендә дауам итә. Һеңлеһе Гүзәлиә лә ағаһына эйәреп, инәләренең тыуған ауылында уҡый башлай.

Тормоштоң аҡ һыҙаты ла, ҡараһы ла бар. Аҡ һыҙаттар оҙайлы һәм сикһеҙ булһын ине лә бит... Ата-әсәләре бер-бер артлы баҡыйлыҡҡа күскәс, Фәнис менән Гүзәлиәне  инәләренең бер туған апаһы, әбейҙәре Фәймә Миҙхәт ҡыҙы Кәримова үҙ ҡанаты аҫтына алып, аяҡҡа баҫтыра.

Иртә ата-әсәһеҙ ҡалғанғамы, Фәнис һеңлеһе өсөн йән атып тора. Хеҙмәт юлын башлағас, әбейе менән һеңлеһенә матди яҡтан ярҙам итә. Хужалыҡ эштәрен иптәш егеттәре менән “һә” тигәнсе атҡарып ташлай. Кеше менән аралашыусан, киң күңелле ир-уҙамандың таныштары, дуҫтары бихисап була.

Махсус хәрби операция иғлан ителеп, ике туған ағай-энеләре шунда юлланғас, Фәнистең күңелендә лә һуғышҡа барырға тигән уй тыуа. 2023 йылдың 14 июлендә үҙ теләге менән Башҡортостандың Шайморатов исемендәге 72-се батальоны составында Украинаға китә. Хеҙмәт иткән осорҙа  “Шайморатов”, “Махсус хәрби операцияла ҡатнашыусыға” миҙалдары менән наградлана.

— Зәйеттәге ҡарт олатайыбыҙҙы ауылдаштары ни сәбәплелер “Музай” тип йөрөткәндәр. Ағайым әллә шуға яу яланында үҙенә “Мазай” позывнойын алды инде... Беҙ борсолмаһын өсөн көн һайын шылтыратырға, йә яҙырға тырышты. Ошо арауыҡта ефрейтор дәрәжәһенә етте. Пулеметсы-наводчик ине. “Унда нисек?”— тип ҡыҙыҡһынһам, “Түҙерлек. Ҡайтҡас эҫе итеп мунса яғып, урам менән байрам итербеҙ!” — тине хыялланып. Бер ваҡытта ла күңел төшөнкөлөгөнә бирелмәне. Мине, балаларымды, Фәймә әбейемде ҡайғыртты. Ауылдағы яңылыҡтарҙы һораша торғайны. “Еңеүҙән һуң, Сирияға барырмын. Хәрби хеҙмәт миңә оҡшай төштө әле”, — тине һуңғараҡ. Ҡыҙғанысҡа ҡаршы, 2024 йылдың 26 декабрендә ағайым Донецк өлкәһенең Отрадовка ауылы ситендә барған алышта батырҙарса һәләк булды, — тип ҡәҙерле кешеһе тураһында һөйләне Гүзәлиә Фаил ҡыҙы.

Бөгөн ябай ауыл малайҙары — заман ҡаһармандары. Фәнистәр ысынлап та сая булаларҙыр.

Дилара Янбаева.

Г.Айытҡолова тарафынан ебәрелгән фото.