Булмышына тап килгән һөнәр

Ҡырҡ йылға яҡын теш табибы булып эшләгән Фәнис Мөхәмәт улы Сурағолов тәжрибәле белгес кенә түгел, хеҙмәткәрҙәре араһында абруйлы остаз, халыҡтың яратҡан табибы, ғаиләһе өсөн өҙөлөп торған тормош иптәше, атай.

Көмәрле һигеҙ йыллыҡ мәктәбенән һуң, 9-10-сы кластарҙа  күрше Липовкала белем ала. Ике ағаһы ла медицина йүнәлешендә һөнәр һайлағас, 1982 йылда бер икеләнмәй ВЛКСМ-дың 15 йыллығы исемендәге Башҡорт дәүләт медицина институтының стоматология факультетына  уҡырға инә. 1987 йылда йүнәлтмә буйынса Ырымбур өлкәһенең Бузулук ҡалаһында  “Бузулукнефть” дауаханаһында  интернатура үтә. Йәш белгесте артабан эштә ҡалырға өгөтләүгә ҡарамай, яҡташыбыҙ тыуған районына ҡайта. Ул ваҡытта Липовка ауылында табип амбулаторияһы эшмәкәрлек итә. Липовка ауыл биләмәһе ярайһы уҡ ҙур. Халыҡ район үҙәгендәге дауаханаға көн ҡалдырып йөрөмәй, үҙҙәрендә генә табиптарға күренә. Фәнис Мөхәмәт улы мөмкин тиклем яҡшы йыһазландырылған дауаханала дөйөм стоматолог булып хеҙмәт юлын башлай.

 1989 йылда Өфө медицина училищеһын тамамлаған Аҙау ауылы һылыуы Фариза Шәрәфетдин ҡыҙы Мөлөкова йүнәлтмә менән Липовка табип амбулаторияһына шәфҡәт туташы итеп эшкә ебәрелә һәм ошонда үҙ бәхетен таба.

Сурағоловтар 1991 йылдың 16 авгусында гөрләтеп туй үткәреп, ғаилә ҡора. Ауылдағы амбулатория оптимизация сәбәпле бөтөрөлгәс,  улар район үҙәгендә Совет урамындағы элекке дауаханала эш башлай. 2008 йылда яңы (әлеге) үҙәк дауахана сафҡа индерелгәс, хеҙмәттәрен шунда дауам итә. Фариза һәм Фәнис Сурағоловтар  дүрт тиҫтә йыл үҙ эштәренә, һөнәрҙәренә тоғро ҡалған, бай тәжрибәле, тырыш белгестәр. Фәнис Мөхәмәт улы күп йыллыҡ намыҫлы хеҙмәте өсөн 2008 йылда “Башҡортостан Республикаһының һаулыҡ һаҡлау отличнигы” күкрәк билдәһе менән наградланған.

 Ике ул, бер ҡыҙ үҫтереп, бөгөн уларҙы оло тормош юлына сығарғандар. Айҙар Ленинград өлкәһе Выборг ҡалаһында төпләнгән, инженер-механик булып эшләй. Азамат һөнәре буйынса инженер-геолог. Кәләше Гөлнур менән Өфөлә йәшәй. Ҡыҙҙары Айһылыу ҙа баш ҡалала, ул — архитектор.

— 2008 йылда Архангел ауылында үҙ көсөбөҙ менән ҙур йорт һалып индек. Быға тиклем эш урыныбыҙҙан бирелгән фатирҙа йәшәгән инек. Тормош иптәшем тәбиғәте менән баҫалҡы, киң күңелле,  ипле, итәғәтле. Балыҡҡа, һунарға йөрөргә әүәҫ. Ауылда тыуып-үҫкәс ни икебеҙ ҙә  хужалыҡ, баҡса эштәрен яратабыҙ, — ти ҡәҙерле кешеһе тураһында Фариза ханым.

Аҙға ғына эшенән бушаған Фәнис Мөхәмәт улы һөнәре тураһында:

—  Стоматолог организмдың дөйөм һаулығын һаҡлауҙа мөһим роль уйнай. Ауыҙ ҡыуышлығындағы ҡайһы бер проблемалар йөрәк ауырыуҙары, диабет, ашҡаҙан-эсәк юлы һәм башҡа системалы ауырыуҙар менән бәйле булыуы мөмкин. Беҙ бындай бәйләнештәрҙе асыҡлайбыҙ һәм пациентты өҫтәмә тикшереүҙәргә йәки башҡа белгестәр менән консультацияларға ебәрәбеҙ.Теш табибына күренергә ҡурҡырға ярамай. Тештәре һау кешенең сәләмәтлеге лә яҡшы. Шуға күрә уларҙы һаҡлау, тороштарын күҙәтеп тороу зарур.

Стоматологтар ҙа башҡа табиптар кеүек үк туҡтауһыҙ белем алабыҙ. Квалификацияны күтәреү программаларын, курстар, тренажерҙар үтәбеҙ, семинарҙарҙа, конференцияларҙа ҡатнашабыҙ. Ошо бөтә үткән эшмәкәрлек стоматолог портфолиоһында иҫәпкә алына. Һәр биш йыл һайын белемебеҙҙе яңыртып, камиллаштырабыҙ.

Был һөнәрҙе һайлауыма бер ҙә үкенмәйем, унан көс, дәрт алып, кинәнес табып  эшләйем, — тине өҫтәп.

Дилара Янбаева.

Автор фотоһы.