Үҫмерҙәр үҙ өлөшөн индерә

Максим Горький мәктәбе уҡыусылары фронт өсөн нефопам препараты менән шприц-тюбикты йөрөтөү өсөн махсус ҡумта —  нефопам-ампульница эшләй. Ул препаратты рюкзакта, дарыу һауытында йәки туранан-тура һалдат кейемендә хәүефһеҙ һаҡларға мөмкинлек бирә. Быяла ампулалар кейс эсендә ватылмай.  

Ислам Айытҡолов, Ислам Смирнов, Егор Мейстер кеүек уҡыусылар информатика һәм математика уҡытыусыһы Алексей Стрельцовтың һиҙгер етәкселеге аҫтында “Үҫеш нөктәһе” кабинетында шәхси аптечкалар өсөн 3D-принтерҙа изделиелар эшләйҙәр.

Принтерҙан сығарылған пластиктан  ампула һауыттары тик сәғәт ярымдан һуң ғына үҙ формаһына инә икән. Уҡыусылар яугирҙәр өсөн ампульницаларҙы партиялар менән фронтҡа ебәрә. Башта бер нисә төрлө модель баҫтырып маташҡандар, һөҙөмтәлә иң уңышлыһын һайлағандар. Ҡумта ике шприцҡа иҫәпләнгән, еңел, тиҙ асыла һәм  ярайһы уҡ ныҡлы.  

Балалар 3D-моделләү менән 2019 йылда мәктәптә “Үҫеш нөктәһе” асылып,  ҙур ҡорамалдар комплекты алғас та  шөғөлләнә башлай. Тәүҙә ябай деталдәрҙән баҫтыралар, яйлап ҡатмарлыраҡтарға күсәләр. Ковид ваҡытында ҡыҫылмалы һаҡлағыс битлектәр әҙерләгәндәр, МХО башланғас,   яугирҙәргә ярҙамға ҡушылалар.

Бөгөн һалдаттар ампульницаларға ныҡ мохтаж,  башлыса уларға заказ бирелә. Яугирҙәр үҙҙәре әйтеүенсә, дарыу һауыты унда иң кәрәкле әйбер. Мәктәп уҡыусылары дрон өсөн өҫтәмә деталдәр эшләргә лә ниәтләй.

Шуныһы иғтибарға лайыҡ: ампульницалар яһау аныҡлыҡ һәм яуаплылыҡ талап итә. Был эшмәкәрлектең һәр аҙымы белем алыуҙы һәм уны тәжрибәлә  ҡулланыуҙы берләштерә.

Дилара Янбаева.

Фото — асыҡ сығанаҡтарҙан.