+12 °С
Ямғыр

Бөтә яңылыҡтар

16 Февраль 2021, 17:31

Рәшиҙә Баязитова шиғырҙары.

Ҡыҙым

Йөҙө балҡып өйгә ҡайтып инә,

Донъя балҡып китә ялт итеп.

Ул булғанда йәнем күккә оса,

Күңелкәйем ҡала ял итеп.

Ысынлап та шулай һағынамы,

Иңдәремдән ала ҡосаҡлап

Ауырыуҙарым һыпырып ташлағандай

Иҙрәй, рәхәтләнәм шул саҡта.

Биш бармаҡтың береһе тигеҙ түгел —

Шулай төрлө икән балалар.

Берәүҙәре “эш” тип үлеп бара,

Бүтәндәре ситтә ҡалалар.

Ҡырҙағылар шулай һағынамы икән

Өҙөлөп тә өҙөлөп үҙәге.

Нисек барайым һуң янығыҙға

Бик һағындым, килә күрәһем.

Ҡулдан эш тә, тәндән көс тә киткән

Аяҡтар саҡ йөрөй тәнтерәп,

Һеҙҙе көтәм, өҙөлөп, зарығып көтәм,

Һеҙгә генә торам йән терәп.

***

Ейәнсәрем.

Кәмиләгә ун йәш тулған —

Үҙе ҡалай һөйөнә.

Түңәрәккә теләп йөрөй

Яуаплылыҡ йөҙөндә.

Өйҙө йыя, һауыт йыуа

Иҙән йыуа, һеперә

Үҙе йырлай, бейеп китә,

Матур һүрәт төшөрә.

Бер минут та тик ултырмай,

Барын да килештерә.

Ярма таҙарта бутҡаға —

Өҫтәлдә саба атта.

Йә бесәйе сысҡан тота,

Йә бейеп йөрөй эттәр.

Ана бер ҡыҙ егет менән

Вальстарҙа әйләнә —

һәр бер нәмә Кәмиләнең

ҡулдарында йәнләнә.

Һоҡланам ейәнсәремә —

Күлдәк тегә ҡурсаҡҡа.

Бесәйҙәрҙе һыу индерә

Емдәр һибә ҡошсоҡҡа.

Сәскәләрҙең, бөжәктәрҙең телен белә, күрәһең.

Зауыҡ менән биҙәп ҡуя

Гөлсәскәләрҙең түтәлен.

Бигерәк дуҫ Шарик менән

Урам буйлап йүгерә.

Төрлө һөнәргә өйрәтә,

Уның күңелен күрә.

Дуҫтары күп Кәмиләнең

Ихатала, баҡсала

Ҡыҙыҡтырыр шөғөл таба

Ҡайҙа ғына булһа ла.

***

Бүләсәрем.

Мәскәүҙән ейәнем ҡайтҡан —

Беҙгә ниндәй һөйөнөс.

Байрам төҫө керҙе йортҡа —

Күңелдәрҙә кинәнес.

Өй тултырып йөрөп ята

Бүләсәрем, ғәләмәт.

Ҡосоп ала, үбеп ала —

Биргән хоҙай бәрәкәт.

Эй кинәнә, беҙҙең янда

Уға бигерәк рәхәт.

Тәүфиҡлы балалар бирҙек,

Бер хоҙайым, мең рәхмәт.

***

Ҡотло булһын тыуған көнөң

Ҡотло булһын тыуған көнөң,

Беҙҙең туй көнө бөгөн.

Ике изге байрам бергә —

Йәшәйек ҡәҙерен белеп.

Арыһынан биреһе яҡын,

Һикһән биш йәш һиңә бөгөн.

Илле биш йыл һөйрәгәнбеҙ

Тормоштоң ауыр йөгөн.

Бар ғүмеремде арнаным

Мин бары һиңә генә.

Төрлө саҡтар булғандыр бит,

Арыманыңмы минән?

Оло юлда маяҡ булды —

“Беҙ балаларға кәрәк”.

Көс, ғәйрәт беҙҙән дә китте,

Хәҙер балалар — терәк.

Ғүмеркәйҙәр үтеп бара.

Мөғхизәләр көтә-көтә.

Томоштоң асылы шунда —

Парлы булыуҙарға ни етә?!

Ҡотло булһын тыуған көнөң,

Юлдарың булһын уңдан.

Гөрләшеп йәшәйек әле,

Йәшәүҙән һуң кем туйған?!

***

Донъя баҫты

“Оло өйгә ни кәрәк — кесе өйгә лә шул кәрәк”

Ниндәй тилбер ҡыҙ булһам да

Кесе донъя йөгө баҫты.

Оло донъяға сығырға

Бөтә юлдарымды япты.

Ҡәйнә тупһаһында — килен,

Етәксе ир, бала бағыу.

Мәктәп юлы, ҡосаҡ-ҡосаҡ

Дәфтәр ҡайта. Дәрес ҡарау

Ата-әсәгә, һәр балаға

Йәмғиәткә кәрәк ярау.

Остом, саптым, йоҡламаным —

Һиҙмәнем ғүмер үткәнен.

Ҡәйнә мәрхүм, үлеп китте.

Балалар өләсәй итте.

Вахта менән эшкә йөрөү

Минең өлөшкә лә етте.

Өфөләрҙә бәпәй көтәм —

Төпсөк ҡыҙымды эшләтәм.

Ялдарымда өйгә китәм.

Өйҙә минең ярҙамыма

Мохтаж балам, ирем көтә.

Мине һағынып, зарығып бөтә.

Береһен һөйөп, әпәүләп,

Икенсеһен бәпәүләп,

Сумка йөкләп тағы китәм.

Аяҡтарым йөрөгәндә

Йүгерҙем инде былай.

Күҙҙәремдең нуры һүнде —

Йәшәйем икән ҡалай?!

Операциялар яһаттым —

Эй, врачтар көслө икән!

Ҡартлыҡтан да берәй дарыу

Яҙып бирмәҫтәрме икән?!

Их, йәшәйһе киләләһә

Кәрәк булып балаларға.

Өй тотҡаһы, терәк булып

Миңә ҡарап торғандарға.

***

Әсә теләктәре

Бер һөйөклө, бик һөйкөмлө бала булдың,

Мәшәҡәттәр тыуҙырманың үҫкән сағыңда.

Ҙур ғорурлыҡ тойоп йәшәп,

Ҡыуаныстар кисерәмен, балам, һинең яныңда.

Ел-ямғырҙан гелән ҡурсаланыҡ,

Ҡар- бурандар сығып өшөтмәһен.

Ҡыштың гүзәл, аяҙ йылы көнөн

Үҙкәйеңә иш иткәнһең.

Ғүмеркәйең, балам, оҙон булһын

Һөйгән йәрең мәңге тоғро булһын

тормош көткәндә.

Балаларың, туғандарың

Һөйөндөрөп кенә торһон ғүмер иткәндә.

Мөлдөрәмә тулып торһон бәхеткәйең

Ыңғай ғына барһын эшләр бар эштәрең

Изгелекле, мәрхәмәтле булып үҫһен

Һөйөп кенә баҡҡан ғүмер емештәрең.

***

Теләк

Һәр бер таныш киткән һайын

Йөрәк тертләп ҡуя.

“Киләһе йән мин түгелме?” —

Тиеп уйлап ҡуям.

Эшләйәсәк эштәрем дә

Өс көнлөк кенә түгел,

Әллә ниҙәр ҡыйратырҙай

Ине лә бит күңел.

Ваҡ-төйәк эш, мәшәҡәттәр

Тотто ҡулдарымдан.

Тау аҡтарыр бәһлеүәндәй

Инем уйҙарымда.

Йәшәп туйманым бит әле,

Бирсе тағы ғүмер.

Эш бәхете, шөкөр, булды,

Ҡартлыҡ бәхете бир.

***

Белем усағы

Мәктәбемә бына тағы

Ҡунаҡ булып килдем әле.

Ихлас көткәндәрен мине,

Күңел һиҙҙе, белдем әле.

Мин уҡытҡан балаларҙың

Балалары уҡый хәҙер.

Барыһына мин өләсәй

Булырға ла мин бик әҙер.

Сырамытам мин уларҙы

Ата-әсәләрен һөйөп.

Осрашабыҙ, һөйләшәбеҙ

Үҙ баламдай яҡын күреп.

Беҙҙе алмаштырған бында

Беҙ уҡытҡан күпме бала.

Белем усағын дөрләтеп,

Тәҙрәләрҙә уттар яна.

Беҙҙең дәүерҙә уҡыны

Һәр бер өйҙән бишәр бала.

Ике урамға биш бала —

Тик шуныһы уйға һала.

Эш эҙләп ситкә ағыла

Ауылдан йәш-елкенсәктәр.

Бигерәк ныҡ үкендерә —

Ябыла күпме мәктәптәр.

Йөрәгемде сәнсеп ала,

Әйтерһең дә үткер бысаҡ…

Һәр ауылда балҡып торһон

Мәктәп тигән изге усаҡ.

Рәшиҙә Баязитова,

педагогик хеҙмәт ветераны.

Благовещенка ауылы.

Читайте нас:

Адресы: 453030, Архангельский район, с. Архангельское, ул. Советская, 18

Телефондар:

Баш мөхәррир: 83477421457

Реклама хеҙмәте: 8-347-74 (2-18-66)

Редакция: 8-34774 (2-12-87)

Кадрҙар бүлеге: 8-34774 (2-18-44)

Электрон почта: [email protected]