Коронавирус ҡабат йоға

Бындай һығымтаны Гарвард университе­тының Медицина мәктәбе һәм дөйөм профилле Массачусетс дауаханаһының инфекция бүлеге (АҠШ) белгестәре яһаған. Ғилми эш менән Science Immunology журналында танышырға мөмкин.

Аныҡлап әйткәндә, тикшереү үткәреү өсөн COVID-19 билдәләре бынан дүрт ай самаһы элек барлыҡҡа килгән 343 пациенттан ҡан алғандар, уларҙың 93% самаһы коронавирус сиренең ауыр, госпиталгә һалыу талап ителгән формаһын үткәргән.

Ғалимдар ҡан плазмаһында булған төрлө антиматдәләрҙең, йәғни SARS-CoV-2 һөжүменә ҡарата иммун системаһы эшләп сығарған аҡһымдарға вирустың сәнскәкле аҡһымы нисек тәьҫир итеүен тикшергән. Билдәле булыуынса, тап ошо “сәнскәк” ярҙамында патогендар күҙәнәктәргә инә.

Һөҙөмтәләрҙе пандемия баш­лан­ғанға тиклем алынған мең ярым кешенең ҡан өлгөләре менән сағыштырғандар. Унан инде түбән­дәгеләр асыҡланған. Баҡһаң, имму­нитеттың вирусҡа ҡарата тотороҡ­лолоғон билдәләгән IgG класлы антимат­дәләр сирҙе ауыр формала үткәргән кешеләрҙә дүрт ай үткәс тә юғары кимәлдә ҡала.

Вирусты нейтралләштергән антиматдә­ләрҙең әүҙемлеге был арауыҡта кәмемәй тиерлек. Шулай итеп, COVID-19 сиренең ауыр формаһын үткәргән кешеләр яңынан коронавирус йоҡтороу ихтималлығынан кәмендә дүрт ай самаһы ышаныслы һаҡланған була, ти ғалимдар.

Антиматдәләрҙең IgA һәм IgM төрҙәренә килгәндә (IgG-ға ҡарағанда тиҙерәк бүленеп сығалар), улар уртаса алғанда ике ай ярым йәки унан да аҙыраҡ ваҡыт эсендә организмдан юҡҡа сыға, шуға күрә пациент­тар­ҙың организмында тап ошо антиматдә­ләрҙең юғары концентрацияһы күҙәтелә икән, тимәк, кеше коронавирусты һуңғы ике ай эсендә йоҡторған.

Белгестәр, танау ҡыуышлығынан алынған ҡәҙимге полимераз селтәрле реакция тесты (ПЦР-тест) тиҙ арала һиҙгерлеген юғалт­ҡан­ға күрә, сир билдәләре оҙаҡ үтмәгән осраҡта, антиматдәләргә лә тест тапшырырға тәҡдим итә. Был коронавирус инфекцияһы йоҡторғандарҙы анығыраҡ асыҡларға ярҙам итер ине, ти ғалимдар.