Зауыҡлы ижад оҫтаһы

Уның ижады хәҙерге башҡорт шиғриәтенең кимәлен баһалаған, шиғри һүҙе күңелдәргә үтеп инер ҡөҙрәткә эйә. Публицистика, драматургия, тәржемә өлкәһендә лә ул ең һыҙғанып эшләй, уңыштары әҙәби премиялар менән бүләкләнә. Тамара Әхмәтшәриф ҡыҙының зауыҡлы ижад емештәре тиҫтәнән ашыу йыйынтығында донъя күрҙе.

Тамара (Тимербикә) Әхмәтшәриф ҡыҙы Ғәниева 1951 йылдың 20 июнендә Башҡорт АССР-ының Көйөргәҙе районы Кинйәбай ауылында тыуған. Һигеҙ йыллыҡ мәктәптән һуң Салауат педагогия училищеһына уҡырға керә, аҙаҡтан Стәрлетамаҡ дәүләт педагогия институтының филология факультетын тамамлай. Мәктәптәрҙә, Стәрлетамаҡ ҡалаһындағы мәҙәниәт техникумында уҡытыусы булып эшләй. Республика телерадиокомитетында, «Ағиҙел» журналында бүлек мөдире вазифаһын башҡара.

Тамара Ғәниева әҙәбиәткә XX быуаттың 80-се йылдарында килә. Уның беренсе китабы «Осрашырбыҙ әле» 1980 йылда донъя күрә. Төрлө жанрҙарҙа бик әүҙем ижад итә. Бер үк ваҡытта республика баҫмаларында көнүҙәк темаларға арналған публицистик мәҡәләләр менән дә даими һәм әүҙем сығыш яһай.

«Башинформ» мәғлүмәт агентлығы хәбәр итеүенсә, 2015 йылдың сентябрендә Башҡортостандың Зәйнәб Биишева исемендәге «Китап» нәшриәтендә Тамара Ғәниеваның «Ғүмер кисеүҙәре» тип аталған яңы шиғри йыйынтығы донъя күрҙе. Унда шағирҙың һуңғы йылдарҙа яҙылған әҫәрҙәре урын алған.

Әҙип тәржемә өлкәһендә лә эшләй. Ул ундан ашыу авторҙың әҫәрҙәрен башҡортсаға тәржемә иткән. Улар араһында Фридрих Шиллерҙың «Мария Стюарт», Альбер Камюҙың «Калигула», Николай Гумилевтың «Древо превращений», Лопе де Веганың «Собака на сене», Николай Гоголдең «Ревизор», Камил Йыһаншиндың «Скитники», «Золото Алдана», «Росомаха» китаптары бар. Донъя һәм рус әҙәбиәте классиктары әҫәрҙәрен башҡорт теленә ауҙарыу буйынса емешле эшмәкәрлеге өсөн Тамара Ғәниева 2015 йыда «Словес связующая нить» Бөтә Рәсәй әҙәби премияһына лайыҡ булды.

2019 йылдың майында Тамара Ғәниеваға «Башҡортостандың халыҡ шағиры» тигән маҡтаулы исем бирелде.

Әҙибәнең әҫәрҙәре тәрән мәғәнәгә эйә. Уларҙың һәр береһендә актуаль булған проблемалар күтәрелә, тәрән уйға ҡалырлыҡ ваҡиғалар менән бай. Йәш быуынға рухи, әхлаҡи тәрбиә биреү өсөн дә әһәмиәтле. Шулай уҡ туған телгә, хеҙмәткә һөйөү, һаҡсыл ҡараш, ғәҙеллек, эшһөйәрлек, намыҫлылыҡ кеүек ыңғай тойғоларҙы ла үҫтереүҙә роле ҙур.

Тамара Ғәниева бөгөнгө заманда йәмғиәткә маяҡ булып юл күрһәтеүсе, халҡы өсөн ал-ял белмәй хеҙмәт итеүсе шәхестәрҙең береһе, шуға күрә ул Шәһит Хоҙайбирҙин исемендәге премияға һис шикһеҙ дәғүә итә ала.